përmirësimi i fundit: 25 Jan 2007 22:08

Të dashur studentë e pedagogë!

       Universiteti “Eqrem Çabej” është një institucion i dashur për miq e kolegë nga vendi e bota përreth, për qytetarët dhe intelektualët e Shqipërisë, për të tërë veprimtarët e dijes dhe të shkencës. Universiteti ynë është veçanërisht mikëpritës për të rinjtë dhe për të rejat, për veteranët dhe pionerët e dritës, të cilët i dhanë jetë dhe emër të nderuar për mbi 30-vjet.

       Në Universitetin tonë mirëpriten idetë më të reja bashkëkohore, programet përparimtare për zhvillimin e shoqërisë, ambicjet profesionale dhe angazhimet e mirëfillta pedagogjike e shkencore. Në Universitetin tonë takohen dhe përsosen kultura dhe rryma të ndryshme gjithmonë duke respektuar individualitetet historike, të sotmen dhe të ardhmen e seicilit.

       Viti i kaluar akademik ka qënë një vit përpjekjesh dhe realizimesh të gjithanshme për të vënë në rrugën e zgjidhjes problemet e shumta të reformimit të shkollës së lartë.Vëmendje e veçantë iu kushtua forcimit të punës mësimore e asaj shkencore, që u materializua në përmirësimet e mëtejshme bashkohore të kurrikulave. Gjatë vitit të kaluar u pasurua e u modernizua më tej baza materialo-didaktike e laboratorike, duke plotësuar më tej kushtet për një punë normale në auditore e bibliotekë. Kualifikimi dhe atestimi i pedagogëve njohu një ngritje të re. Edhe veprimtaria botuese njohu ngritje. Janë botuar mjaft libra të nivelit universitar, parauniversitar e në ndihmë të mësuesve  e të shkollës. Qendrat që funksionojnë pranë Universitetit tonë, si ajo për edukimin qytetar demokratik dhe ajo për gjuhën e kulturën angleze, japin një kontribut të veçantë edhe jashtë mureve të universietit, duke forcuar më tej lidhjet me drejtoritë arsimore të rretheve të Jugut dhe me komunitetet e tyre.

       Gjatë vitit që kaloi u zgjeruan marrëdhëniet e Universitetit tonë me ato të vendeve të tjera, u shtuan kontaktet e bashkëpunimit me universitetet e Selanikut, Janinës, Thesalisë, T.E.I.–së së Epirit, të Barit, Lecces, Kalabrisë etj. u shtuan lëvizjet e personelit akademiko-shkencor jashtë shtetit për kualifikimin e specializimin e tij individual por edhe për pjesëmarrje me referime në konferenca dhe kongrese ndërkombëtare si në Bullgari, Greqi, Itali, Kosovë etj.

       Vitin e Ri akademik e fillojmë në kushte më të mira, me fakultete dhe departamente të konsoliduara si dhe me çeljen e degës së re të matematikë - informatikës. Janë vënë në gatishmëri të gjitha mjediset mësimore e laboratoret dhe është punuar për rregullimin e mëtejshëm të mjediseve të jashtme. Përgjithësisht gjatë këtij viti akademik, vëmendja jonë në mënyrë të veçantë do të përqëndrohet në problemet që kanë të bëjnë me reformimin e Arsimit të lartë sipas Deklaratës së Bolonjës. Këtë vit do të fillojnë procesin mësimor sipas kësaj deklarate 4 degë: e Matematikë – Informatikës, e Ciklit të Ulët, Parashkollor dhe Infermieri, ndërsa vitin e ardhshëm akademik kjo do të realizohet në të gjitha degët e universitetit tonë.

        Për t’u ardhur në ndihmë studentëve për zgjidhjen e problemeve të tyre është ngritur “Qendra e Informimit dhe Këshillimit studentor” pranë mediatekës me kontributin e fondacionit SOROS. Aty studentët do të kenë mundësi të mësojnë e të përdorin Internetin.

        Punën e filluar në drejtim të përgatitjes sonë cilësore le ta shpiem gjithnjë e më përpara.

          Kemi bindjen e plotë, se, gjatë këtij viti, së bashku do të shënojmë arritje të reja. Le të ndihmojmë e të duam njeri-tjetrin, le të manifestojmë kudo një sjellje qytetare, ashtu siç i ka hije njeriut intelektual e të kulturuar.

       Për një Shqipëri të begatë e Europiane, për një vijimësi traditash bashkëkohore Universiteti “Eqrem Çabej” është i hapur dhe i denjë për të gjithë.

       Ne ju urojmë mirëseardhjen!