Mënyra e pranimit të studentëve në Universitetin e Gjirokastrës, sistemet e studimit, format e mësimit, rregullat e vlerësimit të dijes, mënyra e marrjes së diplomës si dhe disa rregulla bazë në lidhje me frekuentimin janë përcaktuar në rregulloren dhe Statutin e Universitetit. Numri i të drejtave të studimit për degët e UGJ, për çdo vit akademik, propozohen nga rektorati dhe miratohen nga Këshilli i Ministrave.

E drejta e studimit fitohet me konkurs ose me vendim të veçantë të bazuar në ligj.

Për t’u regjistruar kandidati duhet të plotësojë e dorëzojë dokumentacionin e mëposhtëm:

• -         Kërkesa e kandidatit, ku të deklarohet dega që ai dëshiron të studiojë.

• -         Deklaratë nëse dëshiron t’i ndjekë studimet me pagesë.

• -         Deklaratë se nuk ka ndjekur apo nuk ndjek studimet në ndonjë shkollë tjetër të lartë.

• -         Dëftesa e pjekurisë së shkollës së mesme dhe fotokopja e saj e noterizuar.

• -         Raport mjeko – ligjor

• -         Çertifikatë personale me fotografi

• -         Dy fotografi  

            Kandidati fitues i konkursit ka të drejtë të ndjekë studimet në vitin akademik për të cilin konkuroi, nëse regjistrohet si student në sekretarinë mësimore të fakultetit përkatës brenda afateve të parashikuara e të shpallura nga UGJ.

         Nëse ai nuk regjistrohet brenda kësaj kohe, Universiteti nuk merr përsipër ruajtjen e të drejtës së studimit.

       Statusi i studentit përfundon me marrjen e diplomës ose me përjashtimin e personit nga Universiteti.

            Afati maksimal i përfundimit të studimeve  të plota në Universitetin e Gjirokastrës është deri në dyfishin e afatit të rregullt, duke pasur të drejtën të rifillojë vitin që duhet të përsëritë edhe dy herë të tjera.

Studentët që nuk arrijnë të përfundojnë studimet brenda këtij afati maksimal e humbasin të drejtën e vazhdimit të studimeve .

Studimet në shkollën e lartë mbyllen me provimet e formimit ose mbrojten e diplomës .

Në Universitetin e Gjirokastrës, format kryesore të punës mësimore janë : Leksionet, seminaret, ushtrimet, punët laboratorike, punët praktike, punimet vjetore, projektet e kursit, praktikat profesionale, kontrollet me shkrim, detyrat, provimet e kursit, provimi i formimit ,etj

Leksionet, si formë e punës mësimore, si rregull, janë me frekuentim fakultativ, por për disa lëndë specifike, në degët e disa fakulteteve, sipas përcaktimeve të këshillave të fakulteteve, frekuentimi është i detyrueshëm për të paktën 75% të orëve mësimore.

Ndjekja e seminareve dhe ushtrimeve është e detyruar në masën 75% të orëve të programit mësimor të lëndës, ndërsa ndjekja e puneve laboratorike dhe e praktikave mësimore e pedagogjike është e detyruar për të paktën 75% të orëve. por jo më shumë se 85% të tyre.

                  Shkalla e përvetësimit të programeve mësimore vlerësohet në bazë të sistemit prej 10 notash. Nota më e vogël e nevojshme për kalim është  “5”-sa. Lëndët që në planin mësimor nuk janë provime, vlerësohen sipas përparimit vjetor. Me vendim të këshillit të fakultetit, në disa prej lëndëve të tilla, vlerësimi mund të bëhet vetëm me shënimin “fitoi” ose  “nuk fitoi”. Për të fituar vlerësimin me notë kaluese ose me shënimin  “fitoi” në një lëndë, studenti duhet të ketë kryer detyrimet e saj dhe të jetë vlerësuar pozitivisht në përfundim të programit të lëndës. Çdo lëndë mësimore vlerësohet me pikë krediti (sistemi ECTS).

                Studenti ka të drejtë të përmirësoje çdo vit mësimor vetëm një notë dhe lënda përkatëse të jetë vetëm nga detyrimet e atij viti. Për këtë ai duhet t’i ketë shlyer të gjitha detyrimet e vitit ose t’i ketë mbetur vetëm një detyrim i pashlyer. Mbetet në fuqi nota e fundit. Provimet për përmirësimin e notave zhvillohen vetëm në sezonin e vjeshtës.

       Kërkesa për përmirësim note i paraqitetet dekanatit para sezonit të riprovimeve.

Për studentët e vitit të fundit këto zhvillohen në periudhën 2-javore para provimit të formimit.

            Studenti që ka plotësuar të gjitha kërkesat e planit mësimor dhe ka mbrojtur diplomën (me temë diplome apo provim formimi) pajiset me diplomën përkatëse, të shoqëruar me vërtetimin e notave të fituara gjatë viteve të studimeve.

       Diplomimi bëhet:

• Me mbrojtjen e një teme diplome.
• Me provim formimi profesional

       Për kurset e ndryshme universitare apo të atyre pasuniversitare, në përfundim të tyre, konform planit mësimor lëshohen po nga këto autoritete  “ÇERTIFIKATA” përkatëse.

       Dorëzimi i diplomave bëhet me ceremoni, në të cilën marrin pjesë autoritetet e fakultetit dhe përfaqësues të Rektoratit.

       Për studentët që kanë marrë gjatë studimeve mbi 80 % të notave 10-ta dhe pjesën tjetër vetëm 9-ta, diploma u jepet e shoqëruar me “çertifikatën e shkëlqyer”.

       Për studentët që gjatë studimeve i kanë përfunduar ato me të gjitha 10-ta jepet “Medalja e artë” dhe emri i tyre shënohet në librin e nderit te Universitetit.

       Kandidat - diplomanti që nuk arrin të pajiset me diplomë për arësye të mos marrjes së provimit të formimit apo mbrojtjes  së temës së diplomës në kohën e përcaktuar në nenin përkatës, pajiset nga dekanati me titullin “specialist i lartë i padiplomuar”, me një dëshmi ku shënohen edhe notat e lëndëve të likujduara.

            Studentët kanë të drejtë :

·        të përdorin të gjitha instalimet dhe paisjet e Universitetit “Eqrem Çabej” për plotësimin e punës së tyre mësimore-shkencore, në përputhje me programet dhe rregullat përkatëse.

·        të përfaqësohen në këshillat e fakulteteve dhe në Senat.

·        të përfitojnë bursë studimi kur plotësojnë kushtet e përcaktuara nga Këshilli i Ministrave si dhe shpërblime të veçanta që administrohen nga Universiteti “Eqrem Çabej”.

·        të studiojnë e të diplomohen edhe në një fushë tjetër studimi në Universitetin “Eqrem Çabej”, por jo në të njëjtin sistem studimi, pasi kanë mbaruar vitin e parë të studimeve dhe fitojnë konkursin e pranimeve për degë të dytë.

·        të organizohen në shoqata studentore jopolitike duke iu përmbajtur përcaktimeve të akteve ligjore e nënligjore përkatëse.

·        të strehohet në konviktet e studentit, nëqoftëse nuk ka vendstrehim tjetër.

Studenti është i detyruar:

• të njohë rregulloret e UGJ e detyrimet e tij dhe të jetë i vetëdijshëm për zbatimin e tyre, në të kundërt UGJ nuk mban përgjegjësi për pasojat që mund të rrjedhin nga mosnjohja e tyre.
• të zbatojë të gjitha rregullat që rrjedhin nga Statuti i UGJ dhe nga çdo akt tjetër ligjor dhe nënligjor në arsimin e lartë.
• të mbajë përgjegjësi për shkeljet e rregullave të UGJ. Dëmi material që ai mund të ketë bërë të zhdëmtohet nga ana e tij në masën që gjykon organi kompetent.
• të shlyhej të gjitha detyrimet e përcaktuara në planin mësimor dhe në programet e lëndëve.

            Shkelje të rregullave të shkollës konsiderohen të gjitha veprimet e kryera nga ana e studentit që cenojnë personalitetin e mësimdhënësit dhe të çdo punonjësi tjetër të shkollës, normat etiko-morale të shoqërisë si falsifikimi i dokumenteve të ndryshme, aktet e rrugaçërisë, të vjedhjeve,etj.,kur këto veprime nuk mbartin elementë të veprës penale.

       Ndaj studentit që kryen veprime të tilla, merren këto masa disiplinore:

Ø      Verejtje me shkrim.

Ø      Përjashtim nga shkolla për një vit.

Ø      Përjashtim nga Universiteti i Gjirokastrës.

Ø      Përjashtim përgjithmonë nga Universiteti i Gjirokastrës.

            Vendimin për përjashtimin e studentit për një vit e merr dekani, ndërsa vendimin për përjashtimin e tij nga Universiteti (duke i hequr vetëm të drejtën e studimit të fituar) dhe përjashtimin nga Universiteti përgjithmonë (duke mos e lejuar të fitojë më të drejtë studimi të mëpasshme në këtë universitet) e merr Rektori i Universitetit mbi bazën e propozimit të dekanit përkatës.

    historiku i UGj     Gjirokastra     te reja     struktura     fakultetet     publikime     informacione     bashkepunime   

FSHN     matematike-fizike     biologji-kimi     matematike-informatike      infermieri

FSHSH     histori-gjeografi      finance       admin publik     turizem     gjuhe letersi      anglisht     greqisht      italisht

FSHE     cikel i ulet      parashkollor