Gjithashtu Gjirokastra përfaqëson një qendër me vlera të mëdha turistike për panoramën dhe mënyrën e ndërtimit. Qyteti është ndarë në dy zona: në qendrën historike që përfshin pjesën e vjetër të qytetit dhe në zonën e lirë që përfshin pjesën e re të qytetit.

   Universiteti ndodhet në pjesën e re, pranë stadiumit të qytetit, në lagjen “18 Shtatori”. Qyteti dhe rrethinat e tij në shekuj kanë nxjerrë figura të shquara të arsimit, të cilët kanë dhënë një kontribut në shkallë kombëtare. Gjirokastra lidhet edhe me emrat e dy intelektualëve më të shquar që ka nxjerrë nga gjiri i saj, me atë të Prof. Eqrem Çabej, studjues, kolos i gjuhësisë shqiptare me emër të madh brenda dhe jashtë vendit, dhe të Ismail Kadaresë, shkrimtar me përmasa botërore, i lauruar me çmime ndërkombëtare dhe disa herë kandidat i çmimit Nobel në Letërsi. Figura e Prof. Eqrem Çabej është përjetësuar në emrin që mban institucioni më i lartë arsimor në Jug të vendit, Universiteti i Gjirokastrës dhe në përmendoren që është ngritur përpara këtij universiteti. Gjirokastra qysh prej kohëve më të vjetra dhe deri më sot gjithnjë ka qënë një qytet me nivel të lartë ekonomik dhe arsimor.