Fakulteti i Shkencave te Edukimit

Fakulteti i Shkencave të Edukimit (FSHE) realizon përgatitjen e mësuesve me arsim të lartë për institucionet parashkollore dhe për klasat 1- 4 të shkollës 8-vjeçare. Gjithashtu me personelin e tij mësimor-shkencor realizon edhe formimin psikologjik e pedagogjik të studentëve të fakulteteve të tjera të Universitetit “E. Çabej” që përgatisin mësues për ciklin e lartë të shkollave 8-vjeçare si dhe për shkollat e mesme.

Fakulteti i shkencave të edukimit ka dy degë: degën e ciklit të ulët e atë të arsimit parashkollor. Në degën që përgatit mësues për ciklin e ulët japin mësim 34 pedagogë, pjesa më e madhe e të cilëve është me grada e tituj shkencorë, ndërsa në atë që përgatit mësues për arsimin parashkollor zhvillojnë mësim 29 pedagogë, gjithashtu në masë dërmuese me grada e tituj shkencorë.

Fakulteti, aktualisht, ka vetëm një departament atë të shkencave të edukimit, i cili drejtohet nga dekani dhe përbëhet nga dy seksione:

1. Seksioni i Shkencave të Edukimit, i cili ndjek të gjitha problemet e degës së ciklit të ulët dhe,

2. Seksioni i Arsimit Parashkollor, i cili ndjek të gjitha problemet e degës së arsimit parashkollor.